মাজুলী

*মাজুলীৰ পৰা প্ৰকাশিত ক্ষুদ্ৰ কাব্যালোচনী‌ঃ* 

(ক) অংকুৰণঃ মাজুলী কবি মঞ্চৰ দ্বাৰা বিশিষ্ট সমাজকৰ্মী প্ৰয়াত তীখৰ শইকীয়াৰ স্মৃতিত মাজুলীৰ সন্তান জনাৰ্দন মহন্তই ছপা খৰছ বহন কৰাত গোপালচন্দ্ৰ বেজবৰুৱাৰ সম্পাদনাৰে ১৯৯০ চনৰ ফ্ৰেব্ৰুৱাৰী মাহৰ পৰা দুমহীয়া কাব্যালোচনী 'অংকুৰণে' জন্ম লাভ কৰে।অসমৰ প্ৰতিষ্ঠিত কবি সকলৰ কবিতা প্ৰকাশ হোৱাৰ লগতে মাজুলীৰ নতুন কবি সৃষ্টিত অৰিহণা যোগোৱা কাব্যালোচনীখনে বেজবৰুৱাৰ সম্পাদনাত গতি লাভ কৰি তিনিটা বছৰ অতিক্ৰম কৰিছিল যদিও পৰৱৰ্তী সময়ত প্ৰয়াত পদ্মবিকাশ নাথৰ সম্পাদনাত 'অংকুৰণ'ৰ দুটামান সংখ্যা প্ৰকাশৰ পাছতেই কাব্যালোচনীখন স্থায়ী ৰূপত নাথাকিল। 

(খ) শঙ্খধ্বনিঃ সদৌ অসম কবি সন্মিলনৰ তদানীন্তন প্ৰধান সম্পাদক থানেশ্বৰ গোস্বামীৰ নেতৃত্বত সদৌ অসম কবি সন্মিলনৰ সংবিধানৰ আধাৰত ১৯৯১ চনত 'লুইতপৰীয়া কবিগোষ্ঠী'য়ে জন্ম লাভ কৰে।সমান্তৰালকৈ গোস্বামীদেৱ আৰু গোপালচন্দ্ৰ বেজবৰুৱাৰ তত্বাৱধানত মাজুলীৰ বনগাওঁ অঞ্চলৰ পৰা এখন কাব্যালোচনী প্ৰকাশৰ পৰিকল্পনাৰ অন্তত ১৯৯২ চনৰ ছেপ্টেম্বৰ মাহৰ পৰা লুইত পৰীয়া কবিগোষ্ঠীৰ দুমহীয়া কাব্যালোচনী 'শঙ্খধ্বনি' মাজুলীৰ দুগৰাকী প্ৰতিশ্ৰুতি সম্পন্ন কবি ডালিমী নাথ আৰু বৰ্ণালী বৰাৰ যুটীয়া সম্পাদনাত প্ৰকাশ হয়। ১৯৯৭ চনত সদৌ অসম কবি সন্মিলনৰ এটি কেন্দ্ৰীয় কাৰ্যসূচীত জ্যোতিষ কুমাৰ তামুলী আৰু ৰজনীকান্ত বৰদলৈৰ যুটীয়া সম্পাদনাত 'শঙ্খধ্বনি'ৰ এটা সংখ্যা প্ৰকাশ হোৱাৰ পাছতে কবিগোষ্ঠীটোৰ নিষ্ক্ৰিয় ভুমিকাৰ বাবে কাব্যালোচনীখনৰ প্ৰকাশ বন্ধ হৈ পৰে। 

(৩) পাপৰিঃ মাজুলীৰ এগৰাকী অন্যতম মহিলা কবি অমিয়া দেৱী বৰঠাকুৰৰ সম্পাদনাত ১৯৯৪ চনত বলিন শইকীয়াৰ তত্বাৱধানত নামনি মাজুলীৰ ভিতৰুৱা অঞ্চল কৰ্দৈগুৰিৰ 'অৰুণোদয় সাহিত্য গোষ্ঠী'ৰ পৰা অধুনালুপ্ত দুমহীয়া কাব্যালোচনী 'পাপৰি' প্ৰকাশ হৈছিল। 

(৪) সংকেতঃ মাজুলীত কাব্য আন্দোলনৰ এটি ভেটি গঢ়াৰ ক্ষেত্ৰত অগ্ৰণী ভূমিকা পালন কৰি অহা গোপালচন্দ্ৰ বেজবৰুৱাৰ সম্পাদনাত ১৯৯৪ চনত বনগাওঁৰ সংকেত প্ৰকাশনৰ পৰা দুমহীয়া কাব্যালোচনী 'সংকেত' প্ৰকাশ পাইছিল।আলোচনীখনে বেছিদিন প্ৰকাশৰ মুখ নেদেখিলে যদিও কাব্যালোচনীখনে মাজুলীত কাব্যচৰ্চাৰ এটি নতুন মাত্ৰাৰ সংযোজন ঘটায়। 

(৫) অনুভৱ মাজুলী আৰু আমিঃ সাহিত্য-সংস্কৃতিৰ ক্ষেত্ৰলৈ নিৰ্ণায়ক অৰিহণা আগবঢ়োৱা মাজুলীৰ অন্যতম গড়মূৰ শাখা সাহিত্য সভাই কবিতাৰ অনুষ্ঠান অনুষ্ঠিত কৰি কবিতাক জনমূখী কৰাৰ চেষ্টাত ব্ৰতী হৈ থাকি ১৯৯৫ চনৰ বাৰ্ষিক অধিবেশনত বীৰেণ ডেকা আৰু ধ্ৰুৱজ্যোতি পায়েঙৰ সম্পাদনাৰে সমগ্ৰ মাজুলীৰ কবিসকলৰ কবিতা সন্নিৱিষ্টৰে বাৰ্ষিক কাব্যালোচনী 'অনুভৱ মাজুলী আৰু আমি' প্ৰকাশ কৰিছিল। 

(৬) চেতনাঃ উজনি মাজুলীত সাহিত্য চৰ্চাৰ ভেটি সুদৃঢ় কৰি ৰাখিবলৈ অসমৰ সাহিত্য জগতত ইতিমধ্যে প্ৰতিষ্ঠা লাভ কৰা কুলেন্দ্ৰ নাথ ডেকা,প্ৰয়াত চেঙাৰাম মৰাং,বন-বিহঙ্গৰ কবি প্ৰয়াত ৰমেশ চন্দ্ৰ পাতিৰ,সঞ্জীৱ দত্ত,প্ৰবীণ দত্ত,গোবিন কুমাৰ খাউণ্ড,ৰজনীকান্ত বৰদলৈ,জয়ন্ত হাজৰিকা আদিৰ সৎ প্ৰচেষ্টাৰে সমগ্ৰ উজনি মাজুলীৰ অঞ্চলটোক সামৰি ছমহীয়াআটীত ২০০০চনত গঠিত 'চেতনা সাহিত্য গোষ্ঠীয়ে অঞ্চলটোত সাহিত্য চৰ্চাৰ এটি সুন্দৰ বাতাবৰণ গঢ়ি তুলিবলৈ প্ৰয়াস কৰিছিল।যাৰ ফলশ্ৰুতিত কবিতা -কাব্যানুষ্ঠান আৰু কবিতা সম্পৰ্কীয় দিশবোৰ আঁজুৰি আনি সাহিত্যগোষ্ঠীটোৰ পৰা ২০০২-২০০৩ চনলৈ সঞ্জীৱ দত্তৰ সম্পাদনাৰে বাৰ্ষিক মুখপত্ৰ 'চেতনা' প্ৰকাশ কৰা হৈছিল।'চেতনা'ৰ গৌৰৱ মুখপত্ৰখনত প্ৰকাশ পোৱা দুগৰাকীমান নতুন মুখৰ কবিয়ে সম্প্ৰতি অসমৰ কাব্যক্ষেত্ৰলৈ ধাৰাবাহিকতা ৰক্ষা কৰি উল্লেখনীয় বৰঙণি আগবঢ়াই আহিছে।