প্ৰতিভা থাকিলেই নহ'ব তাক প্ৰকাশ কৰাৰ সুবিধাও লাগিব আৰু সহযোগো লাগিব। অন্যথা প্ৰতিভাৰ স্ফূৰণ নহ'বও পাৰে। এই কথা মনলৈ এইকাৰণেই আহিছে যে তেজপুৰৰ মাজগাৱৰ ঘৰপৰা চুবুৰি নামে ঠাইত থকা এটি পৰিয়ালৰ প্ৰায় আটাইবোৰ সদস্যৰ প্ৰতিভা আৰু ধাউতি থকাৰ বাবেই বিষ্ণু প্ৰসাদ ৰাভাই বহু যুগমীয়া গীতৰ জন্ম দিয়াৰ উৎসাহ অনুভৱ কৰি অজস্ৰ গীতৰ জন্ম দিছিল আৰু সেই পৰিয়ালটোৰ মাধ্যমেৰে সেইবোৰ ছেনোলা, এইছ, এম, ভি, আদিত বাণীবদ্ধ কৰাই প্ৰচাৰ কৰিবলৈ সুবিধাও পাইছিল। আনকি সেই বিশেষ পৰিয়ালটোৰ  এগৰাকী সম্পৰ্কীয় জীয়ৰী বিষ্ণু প্ৰসাদ ৰাভালৈ বিয়া দি সেই সাংগীতিক ব্যৱস্থাটোক অধিক গজ গজীয়াও কৰিছিল ।
      তমোহৰ দেউ কলাগুৰু বিষ্ণুপ্ৰসাদ ৰাভাৰ পৱিত্ৰ স্মৃতিত আজি তেনে এটি পৰিয়ালৰ কথাই আলোচনা কৰিব খুজি একেবাৰে বাহুল্য নকৰাকৈ তলৰ কথা খিনি উল্লেখ কৰিলোঁ। উদ্দেশ্য কলাগুৰু বিষ্ণুপ্ৰসাদ ৰাভা দেৱ লৈ সশ্ৰদ্ধ প্ৰণাম জনোৱাৰ লগতে তেওঁৰ সংগীত প্ৰতিভাৰ স্ফূৰণত সহযোগ কৰা সেই বিশেষ পৰিয়ালটোক সশ্ৰদ্ধ সোঁৱৰণ কৰা। সেইয়া আছিল তেজপুৰ মাজগাৱৰ ঘৰপৰা চুবুৰিৰ এটি বিখ্যাত পৰিয়াল চন্দ্ৰ হংস দাস নাজিৰৰ পৰিয়াল।
    চন্দ্ৰ হংস দাস নাজিৰ আছিল কলিবাৰীত থকা তেজপুৰ অসমীয়া ভাষা উন্নতি সাধিনী সভাৰ ৰঙ্গ মঞ্চ পুৰণি বাণ থিয়েটাৰৰ আদি কালছোৱাৰ গ্ৰীন ৰূম মেনেজাৰ আৰু স্মাৰক। তেওঁৰ ছয় পুত্ৰ ক্ৰমে প্ৰবোধ বৰুৱা, যোগেন্দ্ৰ প্ৰসাদ বৰুৱা, গোপাল বৰুৱা, সুৰেন বৰুৱা, নগেন বৰুৱা, নৰেন বৰুৱা আৰু এগৰাকী জীয়ৰী গিৰিজা বৰুৱাৰ ভিতৰত কেইগৰাকী মান আছিল সংগীতৰ প্ৰতি বিশেষ ধাউতি থকা। সেই বাবেই ঘৰ খন আছিল সংগীত চৰ্চাৰ বাবে এক অনুকুল ঠাই । এক প্ৰকাৰ সংগীত চৰ্চাৰ পীঠস্থান স্বৰূপ। তেওঁ লোকৰ আটাইকেইগৰাকী ভাতৃ-ভগ্নী আৰু সম্পৰ্কীয় সকলোৰে আছিল সংগীতৰ প্ৰতি অসীম ধাউতি । তাতে আকৌ প্ৰবোধ বৰুৱাই বিয়া কৰাইছিল যোৰহাটৰ প্ৰফুল্লবালা বালা দত্তক। যি গৰাকী প্ৰফুল্ল বালা দত্তই ১৯২১ চনত গান্ধীজী যোৰহাটলৈ যাওতে " আজি বন্দোকি চন্দৰে "গীতটি গাই গান্ধীজীক আদৰণী জনাইছিল।  এই প্ৰফুল্লবালা দত্তৰে ভনীয়েক আছিল প্ৰিয়বালা দত্ত। জন্মতেই লৈ আহিছিল এটি সুধা সনা কন্ঠ । গতিকে সহজেই অনুমান হয় যে চন্দ্ৰ হংস দাস নাজিৰৰ ঘৰ খন সেই সময়ত  গীতৰ আচৰত সততেই মধুৰ হৈ পৰিছিল ! তদুপৰি নাজিৰৰ পৰিয়ালটো আছিল সেই সময়ত নৃত্য-গীত, গদ্য-পদ্য, নাটক-সংলাপ আদিৰে সততেই মুখৰ হৈ থকা কলিবাৰীৰ অ:ভা:উ:সা: সভাৰ ৰঙ্গমঞ্চ বাণ থিয়েটাৰৰে ওত:প্ৰোত সম্পৰ্ক। গতিকে অলিয়া বলিয়া কৃষ্ণ কলীয়া বিষ্ণু ৰাভাৰে সম্পৰ্ক নোহোৱাৰ কথা থাকিব পাৰেনে ? গতিকে চন্দ্ৰ হংস দাস নাজিৰৰ পুত্ৰ, বোৱাৰী, কন্যা সমন্বিতে সকলোৰে সৈতে লগ লাগি বিষ্ণু ৰাভাই সৃষ্টি কৰিলে এটাৰ পিছত আনটো সুমধুৰ গীত। শ্ৰোতা আছে, প্ৰতিভা আছে, সু-সংগঠিত এটা পৰিয়াল কেন্দ্ৰীক শক্তি আছে গতিকে গীতেই নে ? নাটৰো সৃষ্টি হ'ল ।